|
(ಸೋಮವಾರ 14 ಡಿಸೆಂಬರ್ 2009)
ಜಬ್ ವಿ ಮೆಟ್ ಚಿತ್ರದಲ್ಲಿ ಎಲ್ಲರೂ ಮಂತ್ರಮುಗ್ಧರಾಗುವಂತೆ ನಟಿಸಿ ಮನಮನದಲ್ಲಿ ಅದ್ಭುತ ರೊಮ್ಯಾಂಟಿಕ್ ಜೋಡಿ ಎಂಬ ಸ್ಥಾನ ಗಿಟ್ಟಿಸಿಕೊಂಡ ಜೋಡಿ ಶಾಹಿದ್ ಕಪೂರ್ ಹಾಗೂ ಕರೀನಾ ಕಪೂರ್. ಆದರೆ ಆವರೆಗೆ ಅಮರ ಮಧುರ ಪ್ರೇಮ..., ನಾನೇ ವೀಣೆ ನೀನೇ ತಂತಿ... ಎಂದೆಲ್ಲ ಹಾಡುತ್ತಿದ್ದ ಈ ಇಬ್ಬರು ಜಬ್ ವಿ ಮೆಟ್ ತಕ್ಷಣವೇ ಬೇರಾದರು. ಒಬ್ಬರ ಮುಖ ಇನ್ನೊಬ್ಬರಿಗೆ ಕಂಡರಾಗದಂತೆ ಬೇರೆಬೇರೆಯಾದರು. ಕರೀನಾ ಸೈಫ್ ತೆಕ್ಕೆಗೊರಗಿ ನಿರಾಳವಾಗಿ ಉಸಿರಾಡಿದರೆ, ಅತ್ತ ಶಾಹಿದ್ ವಿಲವಿಲನೆ ಒದ್ದಾಡಿ ವಾರಕ್ಕೊಬ್ಬ ನಟಿಯರ ಜೊತೆಗೆ ಗಾಸಿಪ್ ಕಾಲಂಗಳನ್ನು ಅಲಂಕರಿಸಲಾರಂಭಿಸಿದ. ಈಗ ಅಂತೂ ಇಂತೂ ಈ ಜೋಡಿ ಮತ್ತೆ ಒಂದಾಗುತ್ತಿದ್ದಾರೆ. ಅದೂ ಕೂಡಾ ಇದೇ ಮುಂಬರುವ ವ್ಯಾಲೆಂಟೈನ್ ಡೇ ಅರ್ಥಾತ್ ಪ್ರೇಮಿಗಳ ದಿನದಂದು. ಹಾಗಾದ್ರೆ, ಕರೀನಾ ಸೈಫ್ಗೆ ಕೈಕೊಟ್ಟಳಾ ಎಂದು ಆಶ್ಚರ್ಯಚಕಿತರಾಗಬೇಡಿ. ಆದರೆ, ಈ ಹಳೇ ಪ್ರೇಮಿಗಳು ಪ್ರೇಮಿಗಳ ದಿನದಂದು ಒಂದಾಗುತ್ತಿರುವುದಂತೂ ಖಂಡಿತಾ ಸತ್ಯ. ಆದರೆ ಒಂದಾಗುತ್ತಿರೋದು ಮಾತ್ರ ತೆರೆಯ ಮೇಲೆ! ಶಾಹಿದ್ ಕರೀನಾ ಜೋಡಿಯ ಕುಂಟುತ್ತಾ ಸಾಗಿ ಕೊನೆಗೂ ಚಿತ್ರೀಕರಣ ಮುಗಿಸಿದ ರೊಮ್ಯಾಂಟಿಕ್ ಲವ್ ಸ್ಟೋರಿ ಮಿಲೇಂಗೇ ಮಿಲೇಂಗೇ ಚಿತ್ರ ಅಂತೂ 2010ರ ಫೆಬ್ರವರಿ 14ರಂದು ಬಿಡುಗಡೆ ಕಾಣಲಿದೆ!!!
|