ನವದೆಹಲಿ: ಸತ್ಯಂ ಬಹುಕೋಟಿ ಹಗರಣದಲ್ಲಿ ರಾಮಲಿಂಗರಾಜು ಜೊತೆಗೆ ಹಗರಣದಲ್ಲಿ ಭಾಗಿಯಾಗಿದ್ದಾರೆಂಬ ಆರೋಪದಡಿ ಬಂಧಿತರಾದ ಪ್ರೈಸ್ ವಾಟರ್‌ಹೌಸ್ ಸಂಸ್ಥೆಯ ಆಡಿಟರ್ ಶ್ರೀನಿವಾಸ್ ತಳ್ಳೂರಿ ಜಾಮೀನು ಕೋರಿ ಸುಪ್ರೀಂಕೋರ್ಟ್ ಮೊರೆ ಹೋಗಿದ್ದಾರೆ. ಆಂಧ್ರಪ್ರದೇಶ ಹೈಕೋರ್ಟ್ ಸತ್ಯಂ ಹಗರಣದ್ಲಲಿ ಭಾಗಿಯಾಗಿದ್ದಾರೆನ್ನಲಾದ ಆರೋಪದಡಿ ಬಂಧಿತರಾಗಿದ್ದ ಪ್ರೈಸ್ ವಾಟರ್‌ಹೌಸ್ ಸಂಸ್ಥೆಯ ಆಡಿಟರ್‌ಗಳಾದ ಶ್ರೀನಿವಾಸ್ ತಳ್ಳೂರಿ ಹಾಗೂ ಎಸ್. ಗೋಪಾಲಕೃಷ್ಣನ್ ಅವರಿಗೆ ಜಾಮೀನು ನೀಡಲು ನಿರಾಕರಿಸಿತ್ತು. ಈ ಹಿನ್ನೆಲೆಯಲ್ಲಿ ತಳ್ಳೂರಿ ತನಗೆ ಜಾಮೀನು ಬೇಕೆಂದು ಮತ್ತೆ ಸುಪ್ರೀಂಕೋರ್ಟ್ ಮೆಟ್ಟಿಲು ಹತ್ತಿದ್ದಾರೆ.

ನವದೆಹಲಿ: 2050ರ ವೇಳೆಗೆ ಭಾರತ ವಿಶ್ವದ ಮೂರನೇ ದೈತ್ಯ ಆರ್ಥಿಕ ಶಕ್ತಿಯಾಗಿ ಬೆಳೆಯಲಿದೆ ಎಂದು ಅಮೆರಿಕ ಮೂಲದ ಅಂತಾರಾಷ್ಟ್ರೀಯವಾಗಿ ಮಾನ್ಯತೆ ಪಡೆದ ಸಂಸ್ಥೆ ಅಭಿಪ್ರಾಯಪಟ್ಟಿದೆ. ಚೀನಾ, ಭಾರತ ಹಾಗೂ ಅಮೆರಿಕ ರಾಷ್ಟ್ರಗಳು 2050ರ ವೇಳೆಯಲ್ಲಿ ವಿಶ್ವದಲ್ಲೇ ದೈತ್ಯ ಆರ್ಥಿಕ ಶಕ್ತಿ ರಾಷ್ಟ್ರಗಳಾಗಿ ಹೊರಹೊಮ್ಮಲಿವೆ. ಚೀನಾ 2032ರಲ್ಲಿ ಪ್ರಪಂಚದ ಅತೀ ದೊಡ್ಡ ಆರ್ಥಿಕ ಶಕ್ತಿಯಾಗಿ ಹೊರಹೊಮ್ಮಲಿದ್ದು, ಅಮೆರಿಕಾಕ್ಕಿಂತ ಶೇ.20ರಷ್ಟು ಆರ್ಥಿಕವಾಗಿ ಅದು ಮುಂದುವರಿಯಲಿದೆ. ಇನ್ನು 40 ವರ್ಷಗಳಲ್ಲಿ ಬ್ರೆಜಿಲ್, ಚೀನಾ, ಭಾರತ, ರಷ್ಯಾ ಹಾಗೂ ಮೆಕ್ಸಿಕೋ ದೇಶಗಳು ಆರ್ಥಿಕತೆಯಲ್ಲಿ ಮುಂದುವರಿದ ರಾಷ್ಟ್ರಗಳಾಗಲಿವೆ ಎಂದಿದೆ.

ಮುಂಬೈ: ರೋಮಿಂಗ್‌ನವಲ್ಲಿದ್ದಾಗ ಇನ್ನು ಮುಂದೆ ಕರೆ ಮಾಡಿದರೆ ಹಾಗೂ ಒಳಬರುಪ ಕರೆಗಳಿಗೆ ಭಾರೀ ಕತ್ತರಿ ನಿಮ್ಮ ಜೇಬಿಗೆ ಬೀಳುವುದಿಲ್ಲ. ಮೊಬೈಲ್ ಸೇವೆಯಲ್ಲಿ ಸ್ಪರ್ಧೆಗಿಳಿದಿರುವ ಮೊಬೈಲ್ ಸೇವಾ ಸಂಸ್ಥೆ ಭಾರ್ತಿ ಏರ್‌ಟೆಲ್, ರೋಮಿಂಗ್ ದರಗಳನ್ನು ಶೇ 60ರಷ್ಟು ಕಡಿತಗೊಳಿಸಿದೆ. ಗ್ರಾಹಕರು ಬೇರೆ ರಾಜ್ಯಗಳಲ್ಲಿದ್ದಾಗ ರೋಮಿಂಗ್ ದರಗಳು ದುಬಾರಿ ಎನ್ನುವ ಕಾರಣಕ್ಕೆ ಹಲವರು ಮೊಬೈಲ್ ಬಳಸಲು ಹಿಂಜರಿಯುತ್ತಾರೆ. ಆದರೆ ಇದಕ್ಕಿನ್ನು ಹೊಸ ಯೋಜನೆ ಏರ್‌ಟೆಲ್ ಟರ್ಬೊ ಪರಿಹಾರ ನೀಡಿದೆ. ಈ ಹೊಸ ಯೋಜನೆಯ ಪ್ರಕಾರ, ರೋಮಿಂಗ್‌ನಲ್ಲಿ ಇದ್ದಾಗ ಮಾಡುವ ಕರೆ ಮತ್ತು ಒಳಬರುವ ಎಲ್ಲ ಕರೆಗಳಿಗೂ ಪ್ರತಿ ನಿಮಿಷಕ್ಕೆ 60 ಪೈಸೆ ವಿಧಿಸಲಾಗುವುದು. ಏರ್‌ಟೆಲ್‌ನಿಂದ ಏರ್‌ಟೆಲ್‌ಗೆ ಮಾಡುವ ಸ್ಥಳೀಯ ಮತ್ತು ಎಸ್‌ಟಿಡಿ ಕರೆಗಳಿಗೂ ಪ್ರತಿ ನಿಮಿಷಕ್ಕೆ 60 ಪೈಸೆ ದರ ವಿಧಿಸಲಾಗುತ್ತದೆ. ರೋಮಿಂಗ್ ವೇಳೆಯಲ್ಲಿಯೇ ಏರ್‌ಟೆಲ್ ಹೊರತುಪಡಿಸಿ ಇತರ ಸಂಸ್ಥೆಗಳ ಮೊಬೈಲ್‌ಗೆ ಮಾಡುವ ಕರೆಗಳಿಗೆ ಪ್ರತಿ ನಿಮಿಷಕ್ಕೆ 80 ಪೈಸೆ ವಿಧಿಸಲಾಗುತ್ತದೆ.